ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

ቅ. ሥላሴ ካቴድራል

{gallery}pic-cathedral{/gallery}

http://www.trinity.eotc.org.et/site/components/com_gk2_photoslide/images/thumbm/46016501.jpg http://www.trinity.eotc.org.et/site/components/com_gk2_photoslide/images/thumbm/7472451.jpg http://www.trinity.eotc.org.et/site/components/com_gk2_photoslide/images/thumbm/395795church_4.jpg http://www.trinity.eotc.org.et/site/components/com_gk2_photoslide/images/thumbm/357816church_5.jpg
ብፁዕ ወቅዱስ ፓትርያርኩ በተለምዶ 22 እየተባለ በሚጠራው አካባቢ በመገንባት ላይ ያለውን የመንበረ ጸባዖት ቅድስት ሥላሴ ካቴድራል ሁለገብ ሕንጻ ጎበኙ!!

0808

ብፁዕ ወቅዱስ አቡነ ማትያስ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘክሱም ወእጨጌ ዘመንበረ ተክለሃይማኖት በተለምዶ 22 ሁለት እየተባለ በሚጠራው አካባቢና ጎላጎል ሕንጻ ጎን እየተገነባ የሚገኘውን የመንበረ ጸባዖት ቅድስት ሥላሴ ካቴድራል ሁለገብ የልማት ሕንጻ አርብ ሰኔ 2 ቀን 2009 ዓ.ም ከቦታው ድረስ ተገኝተው ጎብኝተዋል፡፡
የጉብኝቱ መርሐ ግብር በተካሄደበት በዚሁ ዕለት ብፁዓን አበው ሊቃነ ጳጳሳት፣ የአዲስ አበባ ሀገረ ስብከት ዋና ሥራ አስኪያጅ መምህር ጎይቶኦም ያይኑ የተገኙ ሲሆን የመንበረ ጸባዖት ቅድስት ሥላሴ ካቴድራል የሥራ ኃላፊዎችና ሠራተኞችም ቀድመው ከቦታው ድረስ በመገኘት ለቅዱስነታቸው፣ ለብፁዓን ሊቃነ ጳጳሳትና ለሀገረ ስብከቱ ዋና ሥራ አስኪያጅ ለመምህር ጎይቶኦም ያይኑ ደማቅ አቀባበር አድርገውላቸዋል፡፡
የሕንጻውን የግንባታ ሥራ በባለሙያነት የሚመሩት ባለሙያዎች በጉብኝቱ ወቅት እንዳብራሩት የሕንጻው ግንባታ ሥራ ከተጀመረ የ9 ዓመት እድሜ ያለው ቢሆንም ነገር ግን ቀደም ሲል የግንባታው ሥራ የመዋቅር ችግሮች፣ የጎደሉ ምሰሶዎችና አግዳሚዎች የነበሩበት ሆኖ በመገኘቱ ክለሳ (ማስተካከያ) የተደረገበት ስለሆነ አሁን የሕንጻው ግንባታ በተመቻቸ መዋቅር ላይ ይገኛል፡፡  በባለሙያዎቹ እንደተብራራው የዲዛይን ክለሳ ሥራም ተከናውኗል፡፡ የግንባታው ሥራው እየተፋጠነ የሚገኘው ይህ ባለ 6 ፎቅ ዘመናዊና ግዙፍ ሕንጻ በውስጡ ዘመናዊ ቢሮዎች፣ የመሰብሰቢያ አዳራሽ እና ሌሎችም የገበያ ማዕከል ያካተተ ነው፡፡

0817


የካቴድራሉ ዋና ጸሐፊ መምህር ሰሎሞን በቀለ ባቀረቡት በጽሑፍ የተደገፈ ሪፖርት ላይ እንደተገለጸው የመንበረ ጸባዖት ቅድስት ሥላሴ ካቴድራል ቦታ የቤተ ክርስቲያኑ ታላቅ ባለውለታ ከነበሩት በኲረ ምዕመናን ከበደ ተካልኝ በ1996 ዓ.ም በስጦታ የተገኘ ሲሆን የቦታው አጠቃላይ ስፋት በካርታው ላይ እንደሚታየው 1636 ካሬ ሜትር ስፋት ያለው እና አሁን በግንባታ ላይ ያለው ሕንጻም የዲዛይን ሥራውን ከሠራው ኤምጂኤም ኮንሰልት እንደተረዳነውና ፕላኑም እንደሚያሳየው ሕንጻው ያረፈበት ቦታ 1080 ካ.ሜ ሲሆን ቀደም ሲል በ1999 ዓ.ም የነበረው የሰበካ ጉባዔ አስተዳደርና የልማት ኮሚቴ የሕንጻ ግንባታውን ለማስጀመር ኤምጂኤም ኮንሰልት በተባለው አማካሪ ድርጅት የከተማውን ማስተር ፕላን መሠረት ባደረገ መልኩ የዲዛይን ሥራውን በማስጠናት የሕንጻው ከፍታ ቤዝመንት፣ ምድር ቤትና ባለ አራት ፎቅ ሕንጻ ለማስገንባት የግንባታ ፈቃድ ከግንባታ ቁጥጥርና ባለሥልጣን በማስፈቀድ በ2000 ዓ.ም ኃይለ ልዑል ተክለ ማርያም ከተባለው የሕንጻ ግንባታ ድርጅት ጋር የግንባታ ውል እንዲሁም ካማካሪ ድርጅት ጋር ደግሞ የሕንጻ ቁጥጥርና የማማከር ሥራውን ውል በመፈጸም የግንባታ ሥራው ተጀምሮ ሣለ የሕንጻው ተቆጣጣሪ መሐንዲሱ ሥራውን በተገቢው ሁኔታ  ባለመቆጣጠሩና የተሰጠውን ኃላፊነት በአግባቡ ባለመወጣቱ እንዲሁም የግንባታ ሥራው በአግባቡ እየተሠራ ባለመሆኑና በተጨማሪ በኮንስትራክሽን ድርጅቱ የሚጠየቀው ተገቢ ያልሆነ የገንዘብ ክፍያ ጥያቄ በካቴድራሉ የምሐንድስና ቴክኒክ ባለሞያዎች እንዲጣራ ተደርገጎ የግንባታ ሥራውም ሆነ የተጠየቀው ክፍያ ትክክል አለመሆኑን በቴክኒክ ኮሚቴው አባላት ተጣርቶ በመቅረቡ ከሕንጻ ተቋራጩ ድርጅት ጋር ከፍተኛ የሆነ ግጭት ተፈጥሮ ከ2004 እስከ 2007 ዓ.ም ጥር ወር ድረስ ሥራው ተቋርጦ ጉዳዩ ወደ ፍርድ ቤት አምርቶና ውሳኔ አግኝቶ ቀደም ሲል የዲዛይን ሥራውን ከሠራው ድርጅት ጋር ውል በመፈጸም በብፁዕ ወቅዱስ አባታችን በተሠጠው መመሪያ ተግባራዊ ለማድረግ ከዚሁ ድርጅት ጋር በመመካከር በፊት የተሠራው የሕንፃው ዲዛይን ለዕንግዳ ማረፊያ (ገስት ሀውስ) አገልግሎት መዋሉ ቀርቶ ለገበያ ማዕከልና ተያያዥ ሥራዎች እንዲውል በጠየቅነው መሠረት አማካሪ ድርጅቱ የዲዛይን ክለሳ በማድረግ ቀደም ሲል የነበረው አገልግሎት ተቀይሮ እንዲሁም አምስት ፎቅ የነበረው ወደ ስድስት ከፍ ብሎ ተሠርቶ ይህንኑ ዲዛይን ለግንባታ ፈቃድና ክትትል ባለሥልጣን ቀርቦ በተሠራው ዲዛይን መሠረት ግንባታው እንዲቀጥል በ2005 ዓ.ም ፈቃድ ተሠጥቶ የሕንጻ ግንባታውን እንደገና ለማስቀጠል የሀገሪቱን ብሔራዊ የጨረታ ሕግ በመከተል ግልጽ ጨረታ በማውጣትና በማወዳደር ጨረታውን ካሸነፈው ባማኮን ኢንጅነሪንግ ከተባለው ሥራ ተቋራጭ ጋር ህጋዊ የኮንስትራክሽን ውል ስምምነት በ2007 ዓ.ም የስትራክቸራል ሥራውን ማለትም ቦሎኬት ደርድሮ፣ ልስን ለስኖ፣ የመብራትና የውሃ እንዲሁም ተያያዥ ሥራዎችን ሠርቶ ሊያስረክብ ከ31,000,000.00 (ሰላሳ አንድ ሚሊዮን ብር) በላይ ውል በመፈጸም ወደ ሥራ የተገባ ቢሆንም አሁን ሥራውን እየሠራ ያለው ባማኮን ኢንጅነሪንግ የግንባታ ሥራውን ለመጀመር የኮንስትራክሽን እና የብረት ጥንካሬው ሳይፈተሽ (ቴስት ሳይደረግ) ሥራ እንደማይጀመር በመግለጹ ይኸው በድርጅቱ የቀረበው ጥያቄ በአማካሪ መሐንዲሱና በካቴድራሉ የቴክኒክ ባለሞያዎች የተደገፈ በመሆኑ የፍተሻ ተግባሩ በመንግሥትና ግል ድርጅቶች ተፈፅሞ ውጤቱ እንደሚያሳየው ከመሠረት ጀምሮ ከፕላን ትዕዛዝና ዝርዝር ሥራ ውጪ የኮንክሪት ሥራዎቹ በፕላኑ መሠረት በትክክል ባለመሠራታቸው ምክንያት በአማካሪው ድርጅት በኩል እንደገና የዳሰሳ ጥናት ተደርጎ ከመሠረት (ከፉቲንግ ፓድ) ጀምሮ እስከ ሁለተኛ ፎቅ ድረስ ማጠናከሪያ ሥራ የተሠራ ሲሆን ለዚህም በተጨማሪ ሥራ ምክንያት የካቴድራሉ ሰበካ ጉባዔ ጽ/ቤት ለተጨማሪ ወጪ የተዳረገ ሲሆን በአጠቃላይ ይህንን የተጨማሪ ክፍያ ጨምሮ የሕንጻ ግንባታው ሥራ እስከ አሁን ድረስ ብር 20,000,000 (ሃያ ሚሊዮን ብር) በላይ ወጪ ተደርጓል በማለት ገልጸዋል፡፡
በመጨረሻም ብፁዕ ወቅዱስ አባታችን ባስተላለፉት አባታዊ መመሪያና መልእክት ሕንጻውን ስንመለከተው ከሰማነው በላይ ሆኖ አግኝተነዋል፡፡ በእጅጉም ተደስተናል፡፡ የተደረገውም የማሻሻያ ሥራ ተገቢ ነው የሥራው አስተማማኝነት እየተመለከትን የሚገባውን ሁሉ እየተመካከርን ይፈጸማል፡፡ ለዚህ ሕንጻ ግንባታ እንዲውል ቦታውን በስጦታ ያበረከቱት ግለሰብ እግዚአብሔር አምላክ ነፍሳቸውን በዓለመ መንግሥተ ሰማያት እንዲያሳርፍልን እንጸልያለን፡፡ የሕንጻውንም ሥራ በሙያ የሚከታተሉትን ባለሙያዎች ለሥራው ጥራት የሚያደርጉትን አስተዋጽኦ እያበረታታን የሕንጻው ግንባታው በታቀደበት ጊዜ እንዲያልቅ ሁሉም የበኩልን አስተዋጽኦ እንዲያደርግ ይገባል በማለት አባታዊ መመሪያና መልእክት አስተላልፈዋል፡፡

 
የገብረ ሰላም በዓል በመንበረ ጸባዖት ቅድስት ሥላሴ ካቴድራል በድምቀት ተከበረ!!!

0035

በየዓመቱ በትንሣኤ ዋዜማ ሲከበር የቆየው የገብረ ሰላመ በዓል በዘንድሮው ዓመት ብፁዕ ወቅዱስ አቡነ ማትያስ ቀዳማዊ፣ ፖትርያርክ ርእሰ ሊቃ ጳጳሳት ዘኢትዮጵያ፣ ሊቀ ጳጳስ ዘአኲስም፣ ወእጨጌ ዘመንበረ ተክለሃይማኖት፣ ብፁዓን አበው ሊቃነ ጳጳሳት፣ የጠቅላይ ቤተክህነት የየመምሪያ ኃላፊዎች፣ የአዲስ አበባ ሀገረ ስብከት ዋና ሥራ አስኪያጅ መ/ር ጎይቶኦም ያይኑ እና የሀገረ ስብከቱ የዋና ክፍል ኃላፊዎች፣ የአዲስ አበባ ገዳማት እና አድባራት የሥራ ኃላፊዎችና ሠራተኞች በተገኙበት ዛሬ ቅዳሜ ሚያዝያ 7 ቀን 2009 ዓ.ም በመንበረ ጸባዖት ቅድስት ሥላሴ ካቴድራል በታላቅ ድምቀት ተከብሯል፡፡  በተረኛው ደብር በደብረ ጽጌ ቅዱስ ዑራኤል ደብር ካህናት ጸሎተ ወንጌል ተደርሷል፡፡
“አሜሃ መልአ ፍስሐ ዓፉነ፤ ወተኀሥየ ልሳንነ፤ አሜሃ ይቤሉ አሕዛብ፡፡” በዚያን ጊዜ አፋችን ደስታን ሞላ፤ አንደበታችንም ሐሴትን ሞላ፤ በዚያን ጊዜ በአሕዛብ ዘንድ፡፡ መዝ. 125÷2 የሚለው የዳዊት መዝሙር በዲያቆዩ በዜማ ተዚሟል፡፡
ከዚያም በዮሐንስ ወንጌል ምዕራፍ 19 ላይ የተጻፈው የወንጌል ቃል በብፁዕ ወቅዱስ ፓትርያርኩ በንባብ ተሰምቷል፤ በወንጌሉ እንደተጻፈው ጌታችን እና መድኃኒታችን ኢየሱስ ክርስቶስ በተሰቀለበት ወቅት እናቱ ቅድስት ድንግል ማርያም እና ቅዱስ ዮሐንስ ወንጌላዊ በመስቀሉ ሥር ቆመው እንደበርና ኢየሱስ ክርስቶስም ከኀዘናቸው እንዳጽናናቸው ያብራራል፡፡
በመቀጠልም ወለመልአከ ሕይወትሰ ሰቀልዎ ለዘተንሥአ እሙታን ገብረ ሰላመ በመስቀሉ ትንሣኤሁ አግሃደ የሚል ያሬዳዊ መዝሙር በተረኛው በደብረ ጽጌ ቅዱስ ዑራኤል ደብር ሊቃውንት ቀርቧል፤ ከዚያም አንሰ እረክብ ሰላመ በእንቲአሁ ለብፁዕ ወቅዱስ አቡነ ማትያስ ወልድ እሁየ ሊተ ወአነ ሎቱ አፈቅሮ እስከ አመ ፈቀደ የሚል ያሬዳዊ ወረብ በቅዱስ ዑራኤል ደብር ወጣቶች ቀርቧል፡፡ ከዚያም በማያያዝ ሁለት የቅኔ ሊቃውንት በዓሉን የተመለከተ ቅኔያት አቅርበዋል፡፡
በመቀጠልም በብፁዕ አቡነ እንድርያስ የኢትዮጵያ ኦርቶዶክስ ተዋሕዶ ቤተክርስቲያን የሊቃውንት ጉባኤ የበላይ ኃላፊ ትምህርተ ወንጌል ተሰጥቷል፡፡ ብፁዕነታቸው በሰጡት ትምህርት በኢየሱስ ክርስቶስ ስቅለት ስደት እና ባርነት ተወግዷል፤ በነፍስ በሥጋ ተቆራኝተው የነበሩ አጋንንት ተበትነዋል፤ የ5500 ዓመት መከራ አልቋል፤ ምድርና ሰማያት ተቀድሰዋል፤ በፈጣሪ ደም ዓለም ተቀድሷል፤ ለሰው ልጆች ካሳ ተፈጽሟል፤ ልጅነት ተሰጥቷል፤ ይህች ዕለት በእግዚአብሔር ዘንድ የድኅነት እቅድ ተይዞባት የነበረች እለት ናት፤ ስብከተ ወንጌል በአራቱም ማዕዘን ተሰራጭቷል፤ መርገመ ሥጋ እና መርገመ ነፍስ ጠፍቷል፤ ይሁዳ ዘነፍስ በዓልህን አድርግ ተብሏል፤ የማናይ ታምራት አይቶ ስላመነ ከአባቱ ከአዳም ቀድሞ ገነት ገብቷል፤ በጨካኙ ጠላት ተይዘው የነበሩት ነፃነት ተሰብኮላቸዋል በማለት ብፁዕነታቸው ሰፋ ያለ ትምህርተ ወንጌል ሰጥተዋል፡፡
በመጨረሻም ብፁዕ ወቅዱስ ፖትርያርኩ ባስተላለፉት አባታዊ ትምህርት እና ቃለ ምዕዳን ዛሬ በዚህ ካቴድራል የተገኘነው የገብረ ሰላመን በዓል ለማክበር ነው፤ ጌታችን እና መድኃኒታችን ኢየሱስ ክርስቶስ ሙስና መቃብርን ያሸነፈበት በዓል ስለሆነ በዓሉ የሰላም በዓል ነው፤ የሰው ልጆች ከዘለዓለማዊ የሲዖል እሥራት የተፈቱበት በዓል ስለሆነ በዓሉ ትልቅ በዓል ነውና እንኳን ለዚህ ትልቅ በዓል በሰላም አደረሳችሁ! በማለት አባታዊ ቡራኬ እና ቃለ ምዕዳን ካስተላለፉ በኋላ የሰላምና የነፃነት ምልክት የሆነውን ቄጤማ ከብፁዓን ሊቃ ጳጳሳት ጀምሮ በካቴድራሉ ለተገኙት ሊቃውንት እና ምእመናን በመስጠት የበዓሉን ምሥራች አብሥረዋል፡፡    
ምንጭ፡-www.addisababa.eotc.org.et

 
የጸሎተ ሐሙስ ሕጽበተ እግር ሥርዓት በመንበረ ጸባዖት ቅድስት ሥላሴ ካቴድራል ተከናወነ

0296

በኢትዮጵያ አርተዶክስ ተዋሕዶ ቤተክርስቲያን በቀመረ ዲሜጥሮስ አቆጣጠር መሠረት በየዓመቱ ሲከበር የቆየው የጸሎተ ሐሙስ ሕጽበተ እግር በዓል በዘንድሮውም ዓመት ብፁዕ ወቅዱስ አቡነ ማትያስ ቀዳማዊ፣ፓትርያርክ ርዕስ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት ብፁዓን አበው ሊቃነ ጳጳሳት እና በርካታ ምዕመናን በተገኙበት በመንበረ ጸባዖት ቅድስት ሥላሴ ካቴድራል በታላቅ ድምቀት ተከብሯል፡፡
ከጠዋቱ 12 ሰዓት ጀምሮ ልብሰ ተክህኖ በለበሱ ቀሳውስትና ዲያቆናት በየክፍለ ሰዓቱ የተመደበውን ጸሎተ ግብረ ሕማማት በዜማና በንባብ፣ በግእዝና በአማርኛ ቋንቋ አስምተዋል፤ የካቴድራሉ ሊቃውንትም በዓሉን አስመልክቶ በቅዱስ ያሬድ የተደረሰውን ቃል እግዚአብሔር በየክፍለ ጊዜያቱ በዜማ አቅረበዋል ፡፡
ብፁዕ ወቅዱስ ፓትርያርኩ ከጧቱ ሦስት ሰዓት ጀምረው በካቴድራሉ በመገኘት አባታዊ ትምህርትና ቡራኬ የሰጡ ሲሆን ጌታችን እና መድኃኒታችን ኢየሱስ ክርስቶስ የደቀመዛሙርቱን እግር እንዳጠበ ቅዱስነታቸውም የብፁዓን አበው ሊቃነ ጳጳሳትን እግር አጥበዋል፡፡
ቅዱስነታቸው በዚያው በካቴድራሉ ለተሰበሰቡ የተለያዩ ተቋማት የሚድያ ባለሙያዎች በዓሉን አስመልክተው ጋዜጣዊ መግለጫ ሰጥተዋል፤ቅድስነታቸው በሰጡት ጋዜጣዊ መግለጫ እንደጠቆሙት በሀገር ውስጥ እና ከሀገር ውጭ ለሚኖሩ የኢትዮጵያ አርቶዶክስ ተዋሕዶ ሃይማኖት እምነት ተከታዮች   በዓሉ የሰላም በዓል እንዲሆንላቸውና የተቸገሩትን በመርዳት በዓሉን እንዲያከብሩ አሳስበዋል ፡፡
በቅዱስነታቸው መልካም ፈቃድ ብፁዕ አቡነ እንድርያስ የሊቃውንት ጉባኤ የበላይ ኃላፊ ትምህርተ ወንጌል ሰጥተዋል ፤ብፁዕነታቸው ባስተላለፉት ትምህርት በዓሉ የአዲስ ኪዳን ሥርዓት የተጀመረበት ፣ቅዱስ ቁርባን ለሐዋርያት የተሰጠበት፣ ጌታችንና መድኃኒታችን ኢየሱስ ክርስቶስ የተማሪዎቹን እግር በማጠብ ትህትናን በተግባር ያሳየበት ነው ፤እኛም ከእርሱ ትህትና ልንማር ይገባል ብለዋል ፡፡
በመጨረሻም ቅዱስነታቸው ሥርዓተ ቅዳሴውን በመምራት የበዓሉ ፍጻሜ ሆኖል፡፡

 
የብፁዕ ወቅዱስ አቡነ ማትያስ ቀዳማዊ ፓትርያርክ ዘኢትዮጵያ 4ኛ ዓመት በዓለ ሢመት በመንበረ ጸባዖት ቅድስት ሥላሴ ካቴድራል በድምቀት ተከበረ!!

390

የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ የብፁዕ ወቅዱስ አቡነ ማትያስ ቀዳማዊ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት 4ኛ ዓመት በዓለ ሢመት የካቲት 24 ቀን 2009 ዓ.ም ብፁዓን ሊቃነ ጳጳሳት፣ የፕሬዝዳንት ዶክተር ሙላቱ ተሾመ ባለቤት ወ/ሮ መዓዛ፣ ከፍተኛ የመንግሥት ባለሥልጣናት፣ አምባሳደሮች፣ የሃይማኖት መሪዎች፣ የጠቅላይ ቤተ ክህነት የየመምሪያ ኃላፊዎች፣ የመንፈሳውያን ኮሌጆች ተወካዮች፣ የአዲስ አበባ ሀገረ ስብከት ዋና ሥራ አስኪጅ መምህር ጎይቶኦም ያይኑ፣ የአዲስ አበባ ሀገረ ስብከት የክፍል ኃላፊዎች፣ የአዲስ አበባ ገዳማትና አድባራት የሥራ ኃላፊዎች፣ የአዲስ አበባ ከተማ ገዳማትና አድባራት የሰንበት ተማሪዎች በተገኙበት በካቴድራሉ በድምቀት ተከብሯል፡፡
በበዓሉ መርሐ ግብር ወቅት የደብረ ምጥማቅ ሰዓሊተ ምሕረት ቅድስት ማርያም ካቴድራል ሊቃውንት፣ የአጫብር ዜማ ምሁራንና የሰንበት ት/ቤቶች ወጣቶች በዓለ ሢመቱን የተመለከተ ያሬዳዊ ዜማ አቅርበዋል፡፡
በመቀጠልም የመንበረ ፓትርያርክ ጠቅላይ ቤተ ክህነት ዋና ሥራ አስኪያጅና በክልል ትግራይ ደቡባዊ ዞን ማይጨው፤ ደቡባዊ ምሥራቅ ትግራይና የምሥራቃዊ ዞን አዲግራት አህጉረ ስብከት ሊቀ ጳጳስ ብፁዕ አቡነ ዲዮስቆሮስ በዓለ ሢመቱን አስመልክተው ባስተላለፉት መልእክት
…ዛሬ በዚህ ቤተ መቅደስ ኦርቶዶክሳዊ ሥርዓትና ትውፊትን በጠበቀ መልኩ እያከበርነው ያለው የብፁዕ ወቅዱስ አቡነ ማትያስ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት 4ኛ ዓመት በዓለ ሢመት የቤተ ክርስቲያናችን በዓል መሆኑ ግልጽ ነው፤ አምላካችን ኢየሱስ ክርስቶስ “ብዙ ነቢያትና ነገሥታት እናንተ የምታዩትን ሊያዩ ተመኙ÷ አላዩምም፤ እናንተ የምሰሙትንም ሊሰሙ ተመኙ÷ አልሰሙም” (ሉቃ10÷24) እንዳለ፤ ብዙዎች አባቶቻችን ይህን ክብር ሊያዩ ተመኝተው ዐረፍተ ዘመን ስለገታቸው ለማየት  አልቻሉም፤ እኛ ግን ይህን ለማየት በቅተናል፡፡ 
ኦርቶዶክሳዊት ቤተ ክርስቲያናችን በራሷ ልጆች የራሷን መንፈሳዊ አስተዳደር መምራት እንድትችል ለማብቃት ብዙ መሥዋዕትነት የከፈሉና ብዙ ጥረት ያደረጉ አባቶቻችን ቅዱሳን ነገሥታት፣ ካህናትና ምእመናን ለዚህ በዓል መሠረት ጥለው አልፈውልናልና ሊታወሱና ሊመሰገኑ ይገባቸዋል፡፡
እነርሱ በጣሉት መሠረት ላይም አሁን ያለነው የቤተ ክርስቲያን አባቶችና ምእመናንም የቤተ ክርስቲያናችን እምነት፣ ታሪክና ሥርዐተ አምልኮት እንዲሁም ሁለንተናዊ፣ መንፈሳዊና ማኅበራዊ ዕድገትና ልማት አስፋፍቶ የመሥራት፣ የመጠበቅና የማስጠበቅ ኃላፊነት አለብን፡፡ በአጠቃላይ በዚህ ወቅት በቤተ ክርስቲያናችን የሚታየው እድገት ብዙና ከፍተኛ ሲሆን በአንጻሩም ለዚህ ዕድገት ዕንቅፋት የሚፈጥሩ ቢጸሐሳውያን መታየታቸው አልቀረም፡፡ በመሆኑም የእነዚህ ቢጸሐሳውያን የሐሰት ትምህርት ለመግታት ቤተ ክርስቲያናችን እምነቷን፣ ታሪኳንና ሥርዐተ አምልኮቷን ጠብቃ ወይም አስፋፍታ ህልውናዋን እንድትጠብቅ ካህናት በትምህርተ ወንጌል ምእመናንን በሥነ ምግባርና በጽንዐ ሃይማኖት ማስታጠቅ ይጠበቅብናል፡፡ ለዚህም የቤተ ክተርስቲናችን የትምህርት ተቋማት ማለትም መንፈሳውያን ኮሌጆቻችን የሚያሰለጥኗቸውን ካህናት በጥራትና በብቃት እንዲያሰለጥኑ መምህራኑን ማበረታታትና ክትትል ማድረግ ይጠይቃል፡፡
ይህንንም ሁሉ በተሟላ ሁኔታ ለመፈጸም ሰላም በዓለም፣ ሰላም በሀገር እንዲሰፍን ቤተ ክርስቲያናችን በነግህና በሠርክ፣ በመዓልትና በሌሊት “ሰላም ለአኀዊነ ወተፋቅሮ ምስለ ሃይማኖት እምኀበ እግዚአብሔር አቡነ ወእግዚእነ ኢየሱስ ክርስቶስ- ለወንድሞቻችን ከአባታችን ከእግዚአብሔር አብ ዘንድ ከሃይማኖት ሰላምና ፍቅር ይብዛላችሁ” (ኤፌ.6÷23) በማለት አዘውትራ ታስተምራለች፡፡
ይህም ሰላም የእግአብሔር ቃል የእግዚአብሔር ትእዛዝ ስለሆነ ሁሉም ሊቀበለውና ሊያከብረው ይገባል፡፡ “አፀምዕ ዘይነብበኒ እግዚአብሔር አምላኪየ እስመ ይነብብ ሰላመ ላዕለ ሕዝቡ ላዕለ ጻድቃኑ ወላዕለ እለ ይመይጡ ልቦሙ ኅቤሁ- እግዚአብሔር አምላክ የሚናገረውን እሰማለሁ÷ ሰላምን ለሕዝቡና ለቅዱሳኑ ልባቸውንም ወደ እርሱ ለሚመልሱ ይናገራልና” (መዝ.24÷8)፡፡  በመጨረሻም ብፁዕ ወቅዱስ ሆይ! የሰላም አምላክ እግዚአብሔር እንኳን ለ4ኛው ዓመት በዓለ ሢመትዎ በሰላም አደረስዎ በማለት በቤተ ክርስቲያናችን ካህናትና ምእመናን እንዲሁም በራሴ ስም መልካም ምኞቴን እገልጻለሁ፤ መጪው ጊዜም የተሳካ የአግልግሎት ዘመን እንዲሆንልዎ እመኛለሁ በማለት አብራርተዋል፡፡
በመጨረሻም ብፁዕ ወቅዱስ ፓትርያርኩ ባስተላለፉት ቃለ ምዕዳንና አባታዊ ትምህርት በዓለ ሢመተ ክህነታችን የግብረ ክህነት አገልግሎታችን፣ የግብረ ኖሎት ጥበቃችን  የስብከተ ወንጌል ተልእኮአችን በንዋየ ቤተ እግዚአብሔር ያለው አያያዛችን ምን ይመስላል? በምን ደረጃስ ይገኛል? የሚለው ቆም ብለን የምናስብበትና የምናስተካክልበት ቀን እንጂ የአንድ ርእሰ ቤተ ክርስቲያን በዓለ ሢመት የምንተርክበት ቀን ብቻ ሊሆን አይገባም፡፡
ከሁሉም በላይ ደግሞ የእግዚአብሔር በጎች የሆኑ ምእመናን በልዩ ልዩ ምክንያት በባዕዳን እንዳይነጠቁ ከምን ግዜም ነቅተን የምንጠብቅበትና በዚህም ቃል የምንገባበት ዕለት ሊሆን ይገባል፡፡
እኛ ሥዩማነ ቤተ ክርስቲያን የተሾምነው በመእመናንና በምእመናት ላይ እንደሆነ አንረሳውም፤ የህልውናችን ዋስትናም ከእግዚአብሔር ቀጥለው እነርሱ መሆናቸውን አንዘነጋውም፤ ሐቁ ይህ እስከሆነ ድረስ እኛ ካህናት ለእግዚአብሔርና ለምእመናን የማንከፍለው መሥዋዕትነት ሊኖር  አይገባም፤ ምእመናንን በተለይም  ሃይማኖት ተረካቢው ወጣቱ ትውልድን እንደ እግዚአብሔር  ቃል ተንከባክበን ካልያዝን የነገ ቀጣይነት ጥያቄ ላይ እንደሚወድቅ ልብ እንበል፤ ምእመናንን የመጠበቅና እግዚአብሔርን የማገልገል ኃላፊነታችን ዘርፈ ብዙ እንደሆነም አንዘንጋው፤ እግዚአብሔር የሥጋም የነፍስም አምላክ እንደመሆኑ መጠን ምእመናን በጎቹም በሥጋቸውም ሆነ በነፍሳቸው እንዲጠበቁ አዟል፤ ለምእመናን ሲል ደሙን ያፈሰሰ አምላክ ምእመናን በሥጋቸውም ሆነ በነፍሳቸው እንዲለሙ እንዲበለጽጉና እንዲያድጉ ይፈልጋል፤ እኛ ሥዩማነ እግዚአብሔር የሆን ካህናት ምእመናንን በሥጋዊ ሕይወታቸው የሰላም ኃይሎችና የልማት አርበኞች ሆነው ራሳቸውንና ሀገራቸውን እንዲሳድጉ፣ የጥንካሬአቸው ዋስትና አንድነት፣ ፍቅር ወንድማማችነት ብቻ መሆኑን እንዲገነዘቡ፣ መለያየት፣ መቃቃር፣ አለመተማንና ቅራኔ የውደቀትና የድክመት ጉዞ እንደሆነ እንዲረዱ አበክረን ልናስተምርና ልናሳምን ይገባል፡፡
በሌላ በኩል ምእመናን በተለይም ወጣቱ ትውልድ ሥጋዊ ልማትን ብቻ እያየ በሥጋዊ ምኞትና ፍላጎት በመሸነፍ (በሴኩላሪዝም)፣ በባህል ወረራና በቅይጥ ሃይማኖት በመባዘን  (በግሎባሌይዜሽን) በስመ ነጻነት ልቅ በሆነ አስተሳሰብ አኗኗር በመዝቀጥ (በሊበራሊዝም) ተጠራርጎ እንዳይጠፋ ቅዱስ ወንጌልን በትክክል ከማስተማር ጋር በቃላችንም ሆነ በሥራችን ምእመናንን የምንስብና የምንወደድ ሥዩማን መሆን ይገባናል፡፡
ይህንን ሁሉ የምናውቅና በሥራ የምንተረጒም ሆነን ስንገኝ እውነትም ጌታ በቤቱ ንብረት ሁሉ ላይ የሾመን ታማኝና ደጋግ አገልጋዮች ነን ማለት ነው፡፡
ስለዚህ የሚወደን የሚያከብረንና የሚንከባከበን ክርስቲያኑ ሕዝባችን ስለ እግዚብሔር ቃልና ለስራሳችን ስንል ያለምንም እንከን በታማኝነትና በደግነት እንድናስተምር፣ እንድናገለግልና እንድንጠብቅ አደራ ጭምር መልእክታችንን በእግዚአብሔር ስም እናስተላልፋለን በማለት የማጠቃለያውን አባታዊ መልእክት በማስተላለፍ የበዓሉ ፍጻሜ ሆኗል፡፡

 
ትምህርተ ሃይማኖት ዘቅድስት ሥላሴ

ለክርስትና ሃይማኖት መሠረቱ ማእከሉና መደምደሚያው ምሥጢረ ሥላሴ እንደሆነ ይታወቃል ምክንያቱም ከቅድስት ሥላሴ አንዱ አካል እግዚአብሔር ወልድ ከቅድስት ድንግል ማርያም ከሥጋዋ ሥጋን ከነፍሷም ነፍስን ነሥቶ ሰው ከሆነ በኋላ የሥላሴ አንድነትና ሦስትነት የታወቀና የተረዳ ሆኖ በመገኘቱ ነው፡፡ ይህም በዚህ በልደት እና በጥምቀት ሰሞን በቂ ትምህርት ሊሰጥበት የሚገባ ነው፡፡
እግዚአብሔር ወልድ ከቅድስት ድንግል  ማርያም ሰው ሆኖ በሥጋ  ከመወለዱ በፊት የቅድስት ሥላሴ አንድነታውና ሦስትነታቸው በግልጥ የታወቀና የተረዳ ባለመሆኑ ሰዎች ስለ ሥላሴ አንድነትና ሦስትነት የነበራቸው እውቀት በጣም ውሱን በመሆኑ ምክንያት በብሉይ ኪዳን ውስጥ ስለአንድነታቸውና ሦስትነታቸው የተነገሩ ጥቅሶችን በአግባቡ ሊተረጉሟቸውና ምሥጢራቸውንም ሊረዱ እንዳልቻሉ መገንዘብ ይቻላል ከዘመን ሥጋዌ በኋላ ግን ምሥጢሩ ለሁሉም ግልጥ ሆኖ ታውቋል፡፡
በመሠረቱ ስለ እግዚአብሔር አንድነትና ሦስትነት የሚሰጠው ትምህርት ረቂቅ ከመሆኑ የተነሣ የፍጡር አእምሮ በቀላሉ ሊረዳው የማይችል ቢሆንም ራሱ እግዚአብሔር በቃሉ የገለጠው እውነተኛ ምሥጢር በቅዱሳት መጻሕፍት ውስጥ ተጽፎ ስለሚገኝ በዚሁ መሠረት ክርስቲያኖች እውነተኛውን ምሥጢር በመምህራን አማካይነት እየተረዱ እምነታቸውን አጽንተው መኖር ችለዋል፣ይህም ታላቅ ምሥጢር ‹‹ ምሥጢረ ሥላሴ ›› በመባል የሚታወቅ ሲሆን በክርስትና ሃይማኖት ተከታዮች ዘንድ ጸንቶ የሚኖር ነው፡፡ ምክንያቱም ከክርስትና ሃይማኖት ልዩነት ያላቸው ሃይማኖቶች ሁሉ እግዚአብሔር አንድ ገጽ አንድ አካል ብቻ እንደሆነ ሲያስተምሩ የክርስትና ሃይማትኖት ግን እግዚአብሔር በአንድነትና በሦስትነት የነበረ፣ያለና፣ የሚኖር መሆኑን የሚያስተምር በመሆኑ ነው፡፡
የአሕዛብ ሃይማኖትም ብዙ አማልእክት እንዳሉ ሲያስተምር የክርስትና ሃይማኖት ግን እግዚአብሔር በሦስትነት ቢገለጥም አንድ አምላክ እንጂ ሦስት አማልእክት አለመሆኑን የሚያስተምርና ይህንኑ የሚያረጋግጥ ስለሆነ ነው፡፡ ከዚህም ጋር ሌሎች የሃይማኖት ተከታዮች እግዚአብሔር አካላዊ ያልሆነ ዝርው ኃይል እንደሆነ ሲያስተምሩ የክርስትና ሃይማኖት ተከታታዮች ግን እግዚአብሔር ረቂቅ (መንፈስ) ቢሆንም በፈቀደ ጊዜ በፈቀደው መንገድ ለወደደው ፍጥረት መገለጥ የሚችል አካላዊ መንፈስ እንደሆነ ያምናሉ ያስተምራሉም፡፡
እግዚአብሔር በባሕርይ፣በመለኮት፣በአገዛዝ፣በሥልጣን በመፍጠርና በመሳሰለው ሁሉ አንድ እንደሆነ በቅዱሳት መጻሕፍት የተመሰከረና የታወቀ እውነት ነው፡፡ ይህንንም እውነት በሚከተሉት ጥቅሶች መረዳት ይቻላል፡፡
‹‹እስራኤል ሆይ ስማ አምላካችን እግዚአብሔር አንድ እግዚአብሔር ነው አንተም አምላክህን በፍፁም ልብህ፣ በፍጹም ነፍስህ፣ በፍፁም ኃይልህ ውደድ (ዘዳ 6፣4)፡፡
‹‹ሁሉን በሁሉ የሚያደርግ እግዚአብሔር ግን አንድ ነው፡፡ (1ኛ ቆሮ 12፣6)፡፡ በእነዚህንና እነዚህን በመሳሰሉ ጥቅሶች ስለ እግዚአብሔር አንድነት ማወቅና መረዳት ይቻላል፡፡
ከላይ በተገለጠውና በተጠቀሰው መሠረት እግዚአብሔር አንድ ነው ቢባልም በስም፣በአካል፣በግብር ሦስት እንደሆነ በቅዱሳት መጻሕፍት የተመሰከረና በክርስትና ሃይማኖት ተከታዮች ዘንድ የታመነ ነው፡፡ ይህም የስም ሦስትነት አብ፣ወልድ፣መንፈስ ቅዱስ በመባል ይታወቃል፡፡ ስለሆነም አብ አብ እንጂ ወልድ ወይም መንፈስ ቅዱስ ተብሎ አይጠራም ወልድም ወልድ እንጂ አብ ወይም መንፈስ ቅዱስ አይባልም መንፈስ ቅዱስም አብ ወይም ወልድ ተብሎ አይጠራም ሦስቱም ግን እግዚአብሔር በሚለው ስም ይጠሩበታል (ዮሐ 1÷1-3፣የሐዋ ሥራ 20÷28)፡፡
አብ፣ወልድ፣መንፈስቅዱስ ለየራሳቸው ፍጹም አካል ፍጹም መልክ አላቸው ግብራቸውም በቅዱሳት መጻሕፍት መሠረትነት ሊቃውንተ ቤተክርስቲያን  እንደሚያስረዱን፡- የአብ ግብሩ መውለድና ማሥረጽ ነው፡፡ የወልድም ግብሩ መወለድ ነው፣የመንፈስ ቅዱስም ግብሩ መሥረጽ ነው፡፡
ሦስትነትን በተመለከተም በሚከተሉትና በሌሎችም ጥቅሶች  መረዳት ይቻላል ለምሳሌ እግዚአብሔር ራሱ ሲናገር እንዲህ ይላል፡፡
‹‹ ሰውን በመልካችን፣በምሳሌያችን እንፍጠር›› (ዘፍ 1÷26)
‹‹ ሰው ብቻውን ይኖር ዘንድ መልካም አይደለምና ረዳት እንፍጠርለት››(ዘፍ 2÷18)
‹‹ አዳም ከእኛ እንደ አንዱ ሆነ›› (ዘፍ 3÷22)፡፡
‹‹ ኑ እንውረድ አንዱ የአንዱን ነገር እንዳይሰማው ቋንቋቸውን በዚያ እንደባልቀው›› (ዘፍ11÷17)፡፡
‹‹የጌታም ድምጽ ማንን እልካለሁ ማንስ ይሄድልናል ሲል ሰማሁ፣እኔም እነሆኝ፣እኔን ላከኝ አልሁ››(ኢሳ 6÷8-9)፡፡ እንዚህ ጥቅሶች የእግዚአብሔርን የአካል
ሦስትነት ያመለክታሉ፡፡ ቢሆንም ከአንድ በላይ የሆነ ቁጥርን ያመለክታሉ እንጂ በሦስትነት የተወሰነ ቁጥርን አያሳዩም የሚል አስተሳሰብ ሊኖር ይችላል ይሁን እንጂ በሁለት ያልሆኑ ከሦስትም በላይ የማይሆኑ በሦስት ብቻ የተወሰኑ ጥቅሶች ከቅዱሳት መጻሕፍት ውስጥ ስለሚገኙ በእነሱ ማስረጃነት ስለቅድስት ሥላሴ ሦስትነትና አንድነት በሚገባ ልንረዳ እንችላለን፡፡ ለምሳሌም ያህል የሚከተሉት ጥቅሶች ሦስት፣ሦስት ጊዜ ተደጋግመው መነገራቸው  በቂ ማስረጃዎች ናቸው
‹‹ እኔ እግዚአብሔር የአብርሃም አምላክ፣የይስሐቅ አምላክ፣የያእቆብ አምላክ ነኝ (ዘዳ 3÷6)፡፡ በትንቢተ ኢሳይያስም እንደተገለጠው መላእክት፡-
‹‹ቅዱስ፣ቅዱስ፣ቅዱስ የሠራዊት ጌታ እግዚአብሔር ምድር ሁሉ ከክብሩ ተሞልታለች---›› በማለት ሲያመሰግኑ ተሰምተዋል (ኢሳ 6÷3) በሌላም በኩል አብርሃም በድንኳኑ ደጃፍ ተቀምጦ ሳለ እግዚአብሔር በመምሬ ዛፍ በተገለጠለት ጊዜ፡- ‹‹ዓይኑንም አነሣና እነሆ ሦስት ሰዎች በፊቱ  ቆመው አየ፣ ባያቸውም ጊዜ  ሊቀበላቸው ከድንኳኑ ተነሥቶ ሮጠ፣ወደ ምድርም ሰገደ›› የሚለው ዓረፍተ ነገር ሦስትነቱን፣‹‹አቤቱ በፊትህ ሞገስ አግኝቼ እንደሆነ ባሪያህን አትለፈኝ ብዬ እለምንሃለሁ››የሚለው ደግሞ አንድነቱን፣‹‹ጥቂት ውኃ ይምጣላችሁ›› እግራችሁንም ታጠቡ ከዚህችም  ዛፍ በታች እረፉ፣ቁራሽ እንጀራ ላምጣላችሁ ልባችሁን ደግፉ፣ ከዚያም በኋላ ትሄዳላችሁ›› የሚለው አረፍተ ነገርም እንደገና ሦስትነቱን የሚገልጥ ነው፡፡ (ዘፍ 18÷1-5)፡፡
በብሉይ ኪዳን መጻሕፍት ስለ እግዚአብሔር የስም፣የአካል እና፣የግብር ሦስትነት የተነገረው ሁሉ በሐዲስ ኪዳን መጻሕፍት ግልጥና ትክክል የሆነ ትርጉም አግኝቶአል፡፡ ለምሳሌ ከሦስቱ አካላት አንዱ አካል እግዚአብሔር ወልድ ሰው ሆኖ ከድንግል ማርያም በድንግልና ከተወለደ በኋላ በ30 ዓመቱ በአጥማቂው ዮሐንስ እጅ በማየ ዮርዳኖስ በተጠመቀ ጊዜ እግዚአብሔር አብ በደመና ውስጥ የምወደው ልጄ ይህ ነው›› ሲል ተሰምቷል፡፡ እግዚአብሔር መንፈስ ቅዱስም በአምሳለ ርግብ በራሱ ላይ ሲያርፍ ታይቷል (ማቴ3÷15-17)፡፡
ከትንሣኤውም በኋላ‹‹እንግዲህ ሂዱና አህዛብን ሁሉ በአብ፣በወልድና፣በመንፈስ ቅዱስ ስም አጥምቋቸው››(ማቴ 28÷19)፡፡በማለት ለደቀ መዛሙርቱ የሰጠው ትእዛዝም ትልቅ ማረጃ ነው፡፡ ሐዋርያው ቅዱስ ጳውሎስም ‹‹የጌታችን የኢየሱስ ክርስቶስ ጸጋ፣ የእግዚአብሔር ፍቅር የመንፈስ ቅዱስም አንድነት ከሁላችን ጋር ይሁን››
(2ኛ ቆሮ 13÷14)፡፡ ሲል ያስተማረው ይህንኑ መሠረት በማድረግ ስለሆነ በእነዚህና እነዚህን በመሳሰሉ ጥቅሶች እየተረዳን ስለ እግዚአብሔር አንድነትና ሦሰትነት  ያለንን ዕውቀት የበለጠ በማዳበር  እምነታችንን ልናፀና ይገባል፡፡
አባቶቻችን ሊቃውንትም የብሉያትንና የሐዲስ ኪዳናትን ትምህርት መሠረት በማድረግ የእግዚአብሔር አንድነትና ሦስትነት በትምህርት ብቻ ሳይወሰን በዘወትር ጸሎትም ውስጥ እነዲገባና ሰው ሁሉ በዚሁ እምነት ውስጥ ሆኖ እንዲጸልይ አድርገዋል፡፡ በዚህም መሠረት የዘወትር ጸሎታችን መጀመሪያው፡- ‹‹ በስመ አብ ወወልድ ወመንፈስ ቅዱስ አሐዱ አምላክ ›› የሚል ሲሆን ይህም ከላይ የተገለጠውን በማቴዎስ ወንጌል  ምዕ 28÷19-20 ያለውን መሠረት ያደረገ ነው፡፡ ቀጥሎም ሦስት መቶ አሥራ ስምንቱ ሊቃውንተ ቤተክርስቲያን በወሰኑት ጸሎተ ሃይማኖት‹‹ሁሉን በያዘ ሰማይና ምድርን፣የሚታየውንና የማይታየውን በፈጠረ በአንድ አምላክ በእግዚአብሔር አብ እናምናለን፣ዓለም ሳይፈጠር ከእርሱ ጋር በነበረ የአብ አንድ ልጅ በሚሆን በኢየሱስ ክርስቶስም እናምናለን ጌታ ማሕያዊ በሚሆን ከአብ በሠረጸ በመንፈስ ቅዱስ እናምናለን›› የሚሉት አነቀፆች በጸሎታችን ውስጥ እንዲገቡ  አድርገዋል ፡፡ እነዚህም አንቀፆች አንድነትና ሦስትነትን መግለጥ ብቻ ሳይሆን  የአብን፣የወልድን፣የመንፈስ ቅዱስን ግብራቸውን ጭምር የሚያሳውቁ ናቸው፡፡
እንደገናም ‹‹እንዘ አሐዱ ሠለስቱ ወእዘ ሠለስቱ አሐዱ፣ይሤለሱ በአካላት ወይትዋሐዱ በመለኮት›› ማለት አንድ ሲሆን ሦስት፣ሦስት፣ሲሆኑ አንድ ናቸው፣  በአካል ሦስት ይሆናሉ፡፡ በመለኮትም አንድ ይሆናሉ፡፡ የሚለው ሐረግ ቅዱሳት መጻሕፍትን መሠረት ያደረገና ስለ ሥላሴ አንድነትና ሦስትነት ያለንን ግንዛቤ የበለጠ የሚያጠናክር ስለሆነ ጸሎት በጸለይን ቁጥር ልናጤነውና ልብ ልንለው ይገባል፡፡ ከዚህምጋር የሥላሴ ሦስትነታቸው በአንድነታቸው የማይጠቃለል፣አንድነታቸው፣ በሦስትነታቸው፣የማይከፋፈል፣ሆኖ፣በስም፣በአካል፣በግብር፣ሦስት፣በመለኮት፣በሥልጣንና በፈቃድ አንድ አምላክ እንደሆኑ በጥልቀት ልናውቅና ልንረዳ ያስፈልጋል፡፡

 
<< Start < Prev 1 2 3 4 5 6 7 8 9 10 Next > End >>

Page 1 of 19

Church Contact

Cathedral Parish Council Office
Tel : 011-1-23-35-18 / 011-1-23-35-15
Post:
3137 Addis Ababa
Ethiopia

Orthodox Calendar

ማስታወቂያ

ለመንበረ ጸባዖት ቅድስት ሥላሴ ካቴድራል እድሳት የበኩልዎን አስታዋጽዖ ያድርጉ!

መርዳት የምትፈልጉ ምዕመናን ሁሉ የሚከተለውን አድራሻ መጠቀም ትችላላችሁ፡፡

አራት ኪሎ ቅርንጫፍ, ቁጥር= 0171859072600/2637 (መንበረ ጸባዖት ቅድስት ሥላሴ ካቴድራል እድሳት )

ብላች መላክ ትችላላችሁ፡፡